Det er behov for fleire tilsette i barnehagane våre

Barnehagane er ei viktig velferdsteneste, og det hastar med å få på plass ei strengare lovfesta bemanningsnorm som fører til færre barn per tilsett i barnehagane i Noreg. Dei barnehagetilsette, ei rekkje foreldrerepresentantar og fagforbunda som har medlemmar i barnehagane har i mange år ropt ut om den alt for låge bemanningsnorma i barnehagen. Det er nødvendig med ei bemanningsauke for alle alderskulla i barnehagane.

Det legemelde sjukefraværet i norske barnehagar, som omfattar over 100 000 tilsette, er på totalt 8 prosent, som er 63 prosent høgare enn gjennomsnittet for alle tilsette i Noreg. Talet på barnehagetilsette som går ut av arbeidslivet før dei fyller 63 år, er stabilt høgt. Samstundes er det nedgang i talet på dei som søkjer seg inn på barnehagelærarutdanningane.

I ei undersøking som Utdanningsforbundet har gjort blant 4600 av deira medlemmer som er barnehagelærarar, svarar 1 av 3 at dei ser for seg å slutte i jobben i løpet av 1-3 år, og dei fleste av dei som seier dette er 40 år eller yngre. I den same undersøkinga kjem det fram at berre 10 prosent av barnehagelærarane seier at dei ser føre seg å jobbe i barnehage i meir enn 10 år til. Ein rapport i frå Statistisk Sentralbyrå frå i fjor synte at berre 66 prosent av dei som arbeida som barnehagelærarar i 2011 framleis var barnehagelærarar i 2021.

Dagens bemanningsnorm gjer det vanskeleg for barnehagetilsette å følgje opp det stadig større ambisjonsnivået for barnehagane. Det er jo ikkje slik at kvar einskild barnehagetilsett plutseleg får fleire armar, eit ekstra fang og auge i bakhovudet av at politikarar på Stortinget og i regjeringa kjem med auka krav til innhaldet i barnehagane. Dei rammevilkåra som gjeld for barnehage i dag, slit ut særs mange barnehageassisentar, barne- og ungdomsarbeidarar, barnehagelærarar og pedagogiske leiarar i barnehagane.

Fagforbundet, Utdanningsforbundet og Delta krev alle ei styrka bemanning med fleire tilsette i barnehagane, som fører til at det vert færre barn per vaksen. Raudt Sogn og Fjordane stør dette kravet. Ei auke i bemanninga i barnehagane er nødvendig, ikkje berre av omsyn til arbeidsvilkåra og den personlege helsa til den einskilde barnehagetilsette, men òg av omsyn til kvardagen til barnehagebarna.