Her har antallet søkere til barnehagelærer økt med 31 prosent

Søkartalet til barnehagelærarutdanningane går ned med 16 prosent totalt sett, viser tal frå Samordna opptak.

Men det finst nokre lyspunkt i den dystre statistikken.

17 av 43 utdanningar har fleire førstevalssøkjarar enn dei har planlagde studieplassar, viser ei oversikt Khrono har publisert.

Høgskulen i Volda (HVO) er eitt studiestad som skil seg ut i positiv retning.

Mot straumen 

HVO tilbyr barnehagelærarutdanning både på heiltid og deltid. Begge utdanningane har ein markant framgang samanlikna med fjoråret, skriv HVO i ei pressemelding.

Til heiltidsutdanninga er det førstevalssøkjarar til om lag halvparten av dei 60 planlagde plassane. I fjor var det berre søkjarar til om lag ein tredel av same tal plassar.

Deltidsutdanninga har over dobbelt så mange søkjarar som dei har plassar, med 47 søkjarar og 20 plassar.

I tillegg har den arbeidsplassbaserte barnehagelærarutdanninga, som er ein del av det lokale opptaket ved HVO, fått 27 søkjarar.

– Det er godt å sjå denne framgangen. Søkjarane vil tre inn i eit yrke som er viktig for samfunnet, og vi veit det er stort behov for kvalifiserte fagfolk i barnehagane, seier rektor Odd Helge Mjellem Tonheim.

Han fortel at tilsette og studentar hos dei har reist rundt til kommunar i Møre og Romsdal og Nordfjord for å få folk til å søkje.

– Eg trur vi ser eit resultat av det i søkjartala no, seier Mjellem Tonheim.

Arbeidsplassbasert utdanning slår an 

Også andre stader i landet er dei arbeidsplassbaserte utdanningane populære. Eit nytt tilbod har freista 16 førstevalssøkjarar til barnehagelærarutdanninga i Sogndal. Dermed startar den truleg opp att.

Universitetet i Innlandet melder om 61 søkjarar til 25 plassar på arbeidsplassbasert barnehagelærarutdanning, som vart oppretta i fjor sommar. Dei andre barnehagelærarutdanningane deira har derimot ein nedgang i talet på søkjarar.

OsloMet opplever same utvikling. Også her er det nedgang i talet på søkjarar samanlikna med i fjor, men arbeidsplassbasert utdanning er populært. OsloMet har 90 søkjarar til 65 studieplassar på dette studiet.

— Vi har eit godt samarbeid med universitetsbarnehagane våre, og er glade for å kunne gi fagarbeidarar og assistentar moglegheit til å ta utdanning på arbeidsplassen, seier rektor Christen Krogh på oslomet.no.