Ap vil gje jobbtilbod til unge i barnehagar og SFO

– Målet er at ingen ungdom skal kjenne på kjensla av å vere unyttig eller gløymd, seier helse- og omsorgsminister Jan Christian Vestre (Ap) til Fagbladet.

Programmet er ein del av partiprogrammet til Arbeidarpartiet, som vart vedteke i vår. Etter planen skal det såkalla ungdomsprogrammet starte opp til hausten og etter kvart bli utvida til å gjelde heile landet i løpet av dei neste fire åra.

Unge som står utanfor arbeidslivet og utdanning, skal få opplæring og arbeidstrening i barnehage, SFO og sjukeheim – og til slutt ende opp med fagbrev og fast jobb.

– Å satse på unge som står utanfor, er like viktig som å byggje veg og infrastruktur. Det handlar om samfunnets berekraft, seier Vestre.

– Ikkje alle er eigna til å jobbe med barn eller i omsorgsyrke. Kva vil de gjere for å sikre at de får inn dei rette i dette programmet?

– Ein vil jo prøve seg litt. Viss ein har motivasjon for det, er litt nysgjerrig, interessert, prøver seg litt og ser om det kan vere noko – og byggjer vidare på det. Det vil vere ein naturleg stillingsprosess. Men det vil ikkje vere for alle. Det å vere eigna gjeld i alle yrke, seier Vestre.

I tillegg har Ap og Fagforbundet utarbeidd fire andre punkt som skal sikre fleire jobbar i helsesektoren. Det skal satsast på faste stillingar, bli mindre bruk av vikarbyrå, meir oppgåvedeling og fleire skal få sjansen til å ta fagbrev.

Helene Harsvik Skeibrok, nestleiar i Fagforbundet, er begeistra.

– Vi i Fagforbundet har lenge etterlyst tiltak som faktisk treff unge som står utanfor – dette programmet kan bli eit vendepunkt, seier Skeibrok til Fagbladet.

(©NTB)