SPALTIST Anita Holm Cirotzki

Det er på tide å prioritere oppgåver i barnehagen

Vi barnehagetilsette er så løysingsorienterte at vi nesten viskar ut oss sjølve. Det må vi slutte med.

Publisert 30.06.2025 - 06:35

Barnehagen fløymer over av oppgåver som har lite eller ingenting med det pedagogiske arbeidet å gjere. Nokre tidstjuvar må vi leve med, men ein del oppgåver kan med fordel kuttast ut eller reduserast.

Det er på høg tid å sjå på tidsbruk opp mot nytteverdi, og då kva nytteverdi oppgåvene har med tanke på barna. Kva er det nyttig for barna at barnehagelærarane brukar tid på?

Lovpålagt eller sjølvpålagt?

Barnehagetilsette strør, skuffar snø, og nokre reparerer møblar og skiftar filter i ventilasjonsanlegget. Barnehagetilsette rapporterer meir, oppdaterer den digitale plattforma fleire gonger dagleg og utfører oppgåver som reinhaldaren eller vaktmeisteren gjorde før, for å nemne noko.

Anita Holm Cirotzki

er barnehagelærer, sentralstyremedlem i Utdanningsforbundet og leder i kontaktforum for barnehage.

Er alle oppgåvene som barnehagen utfører, naudsynte for å oppfylle rammeplanen? Vi må sortere oppgåver og vurdere kva vi skal prioritere, og vi må spørje oss sjølve om oppgåvene er lovpålagde eller pålagde av andre – eller om dei kanskje er sjølvpålagde? Vi må òg vurdere om oppgåvene kan gjerast på andre måtar, om vi bør redusere omfanget eller kutte dei ut? Og ikkje minst: Er dette eigentleg vår oppgåve?

Plantid får skulda

Plantida får ofte skulda for at det er færre tilsette saman med barnegruppa, men det er mykje anna som i større grad tek tilsette vekk frå barn og barnegruppe, og dei tidstjuvane bør vi snakke mykje meir om. Plantid er trass alt avtalefesta og viktig for det pedagogiske arbeidet. Ho må vernast.

Vi barnehagetilsette har ein tendens til å vere så løysingsorienterte at vi nesten viskar ut oss sjølve. Det må vi slutte med, både for vår eiga helse si skuld og for barna si skuld. Vi skal ikkje ta på oss ansvaret for å måke snø fordi teknisk avdeling har det så travelt, eller kutte planleggingstida fordi det var så mange andre gjeremål som måtte utførast.

Dette innlegget har òg vore på trykk i Første Steg nr. 2/2025

Må redusere oppgåver

Mange tilsette går heim med dårleg samvit for alt ein ikkje fekk gjort eller følgt opp. Sjukefråværet er skyhøgt og pensjonsalderen låg, fordi ein ikkje klarer å stå i arbeid til ordinær pensjonsalder. Barnehagetilsette brenn lyset i begge endar.

Dette kan ikkje halde fram. Tilsette, styrar og eigar må saman belyse og redusere oppgåver som tek tid og merksemd vekk frå barnegruppa. Slik får vi også ein meir helsefremmande arbeidsplass. Leiarar og eigarar har eit særleg ansvar i dette arbeidet.