Mållaget heidrar Ole Danbolt Mjøs
Leiar i Den norske Nobelkomiteen, Ole Danbolt Mjøs, vert tildelt målblome frå Noregs Mållag. På fredsprisutdelinga i dag vil Mjøs presentere prisvinnaren Martti Ahtisaari og lese grunngjevinga på nynorsk - slik han har gjort det tidlegare.
- Når Ole Danbolt Mjøs står på podiet i Oslo Rådhus og les prisgrunngjevinga, så gjer han det samtidig for nær ein halv milliard menneske på nynorsk. Han er truleg den som når lengst ut i verda med nynorsk, smiler Hege Myklebust, leiar i Noregs Mållag.
- Dette er ei flott markering, og han fortener takk. Noregs Mållag er oppteken av at nynorsk kan nyttast i alle samanhengar, og Ole Danbolt Mjøs syner oss at det nettopp går an å gjere, seier Hege Myklebust.
Ho har invitert han til landsmøtet i Noregs Mållag i Oslo i april, då vil han få tildelt sin diplom og hjarteleg takk frå mållaget.
