Senter mot nynorskfordommar

Det var under arbeidet med Kultur for læring at statsråden kom på tanken om eit nynorsksenter, forsto vi då direktør for Nynorsk kultursenter, Ottar Grepstad, i dag talte ved opninga av Nynorsksenteret på Høgskulen i Volda.
 
I stormen kring skuldingane om å ville kutte ut skriftleg sidemålsopplæring og obligatorisk eksamen både i grunnskolen og vidaregåande skole, fekk ho roa ned oppstyret ved å kome med framlegget om senteret som ho opna i dag.
 
- I fjor vår, som elles, var det mykje snakk om åtak på nynorsken. I dag bør vi heller snakke om åtaket på fordommane. Ideen om eit slikt senter var både eit åtak mot fordommar som i tiår har fått lov til å rotfeste seg i skolekvardagen, og mot fordommar om kven som kan tenkje nytt når det røyner på, sa Grepstad og trakk fram at nynorskfolk ikkje akkurat var bortskjemde med at statsrådar frå Høgre festar slikt grep om røynda.
 
Denne rosen fekk Clemet frå den framstående nynorskmannen som i dag fekk ein ny nabo i kjerneområdet for nynorsken.
 
Det var ikke berre vi som syntest det tok seg underleg ut at den bokmåltalande Høgrekvinna sto for opninga av Nynorsksenteret. Kan hende syntest ho det sjølv, for ho innrømma at ho hadde gått vegen frå å vere motstandar av sidemålsopplæring i skolen til å ta eit tak mot alle fordommane mot nynorsk.
 
Då statsråden sto for den offisielle opninga av nynorsksenteret, sa ho at landet treng eit nasjonalt senter som kan drive systematisk forsøks- og utviklingsarbeid for å fremje nynorskopplæringa.
 
- Arbeidet skal vere retta mot innhaldet i faget. Ein tek sikte på tiltak som vil styrkje kompetansen, og som kan fremje motivasjonen hos elevar og lærarar, sa Clemet og la ut om at senteret kjem inn i rekka av fleire faglege kompetansenter.
 
Sjette senter
Frå før har vi Lesesenteret ved Universitetet i Stavanger, Naturfagsenteret ved Universitetet i Oslo, Matematikksenteret ved NTNU i Trondheim og Nasjonalt senter for fleirkulturell opplæring ved Høgskolen i Oslo.
 
Prosjektleiar for Nynorsksenteret, Anne Steinsvik Nordal, tok til orde for at dei viktigaste oppgåvene er å arbeide for nynorskkrav i dei nasjonale prøvene og den nye læreplanen. Ho sa at senteret vil leggje vekt på at det skal bli nasjonalt, men ha avdelingar rundt om i heile landet.
 
- Vi treng eit kunnskapeløft i nynorsk, eit språk som mange oppfattar som vanskeleg fordi dei  ikkje meistrar språket, sa Steinsvik Nordal.
 
Politisk arv
Clemet var med og utforma Høgres prinsipprogram i 1990, men landsmøtet avviste at sidemålopplæringa i skolen skulle vere frivillig.
 
Sidan har Høgre programfesta frivillig sidemålsopplæring, men Samarbeidsregjeringa vil ikkje gå så langt, og no taler statsråden med regjeringas stemme.
 
- Eg har ikkje lenger veldig bastante meiningar om den plassen sidemålet skal ha i skolen. Eg føljer Sem-erklæringa, sa ho og beklaga at noe av motstanden mot sidemål var heilt fastlåst. Vidare trakk statsråden fram at manglande evne og motivasjon blant elevane kjem av kvaliteten på opplæringa.
 
Om forsøket i Oslo
På pressekonferansen før opninga av Nynorsksenteret vart ho spurt om korleis ho ser på at ingen vil evaluere forsøket med frivillig nynorskopplæring i vidaregåande skole i Oslo.
 
Clemet fråskreiv seg ansvaret for forsøket og sa at ho berre kjente til det frå avisene. Ho viste til at det er Utdanningsdirektoratet som har ansvaret for forsøket. Ho ville heller ikkje seie om ho var bekymra for at ingen vil evaluere forsøket.
 
- Det får Utdanningsdirektoratet svare for, sa Clemet og ga utrykk for at det berre er tull at ho skulle stå bak og trekkje i trådene.
 
Prosjektleiar Steinsvik Nordal sa at det er mykje bra i forsøket, men at det er kritikkverdig at det ikkje blir lagt opp til at elevane skal lære å skrive nynorsk. Ho ville berre gå god for forsøket dersom elevane får skriftleg opplæring i sidemål.
- Ein lærer ikkje språk godt nok utan å skrive det, slo Steinsvik Nordal fast.