Utdanningsforbundet sel eigedom i Oslo, men prisen er hemmeleg

Utdanningsforbundet har eigd bygget gjennom Utdanningsforbundets fond, som sit på verdiar som skal nyttast mellom anna til streikeutbetalingar ved konflikt. I tillegg til eigedom er verdiane òg plasserte i aksjar, obligasjonar, bankinnskot og pengemarknaden.

Fondsstyret vedtok salet 7. desember mot ei røyst.

– Å ha så store verdiar knytt til ein enkelt eigedom gjer oss mindre fleksible og meir sårbare. Sentralstyret vedtok ein kapitalforvaltningsstrategi så seint som i oktober. Denne strategien legg opp til at Utdanningsforbundet normalt skal ha ein langt lågare eigedomsdel enn før salet av Wergelandsveien 15, seier Haugsbø.

Gunn Marit Haugsbø understrekar at då Utdanningsforbundet kjøpte eigedomen i Hausmanns gate 17, der forbundet sitt sentrale sekretariat held til, låg det til grunn at organisasjonen over tid skulle selje dei andre kontoreigedomane. Ho ser såleis dette som ei avrunding av ein prosess.

– Fondsstyret har valt å lytte til dei faglege råda undervegs i denne prosessen, både når det gjeld om eigedomen skal seljast og når det gjeld tidspunkt for sal av eigedomen, seier Gunn Marit Haugsbø, som har vore styreleiar i Utdanningsforbundets fond sidan 1. desember.

Haugsbø understrekar at det har vore viktig for henne å lytte til argument både for og mot salet.

– Ein må og ha respekt for at det kan vere knytt kjensler for bygget si historie. Det sentrale har vore å ta stilling til kva som er rett måte å forvalte verdiane i tråd med kva fondet skal nyttast til.

6. februar skal fondsstyret ha eit nytt møte, der det skal ta stilling til korleis pengane frå salet skal plasserast.

Lokk på salssummen

Som ein del av salsavtalen har Utdanningsforbundet lova kjøparen Aberdeen å ikkje gå ut med salssummen, opplyser avdelingsleiar Tom Christian Axelsen i Utdanningsforbundet.

Jens Petter Guthus i Aberdeen stadfestar at summen er konfidensiell.

– Vi kommenterer aldri summen, korkje når vi kjøper eller sel. Det er ein policy vi har, som både kjøpar og seljar respekterer ved alle slike transaksjonar.

– Etter kvart vil jo summen uansett gå fram av Utdanningsforbundet sine rekneskap.

– Vi kommenterer ikkje prisen. Du får ikkje noko meir ut av meg om dette, seier Guthus.

Han kan likevel opplyse at planen er å halde fram med å leige ut bygget. 

– Wergelandsveien sikrare enn aksjar

Då sentralstyret i Utdanningsforbundet handsama saka rett før jul, foreslo sentralstyremedlem Thom Jambak å takke nei til tilbodet frå Aberdeen. Framlegget fekk støtte frå tre andre medlemmar av sentralstyret.

– Etter mitt syn vil ein fast eigedom på ein så attraktiv adresse vere ei sikrare plassering av verdiane enn i aksjar og fond, seier Jambak til Utdanning.

Jambak understrekar at motargumenta hans var basert på kva som var riktig forvalting av verdiane, og ikkje nostalgi.

– Men når vedtaket no er fatta, er eg viss på at fondsstyret vil forvalte verdiane godt, legg han til.