Utdanningsforbundet vil tydeleggjere pedagogisk ansvar i barnehagen
Ansvaret pedagogane har for innhaldet i barnehagen, må tydeleg fram i den nye rammeplanen, ifølgje sentralstyret i Utdanningsforbundet.
Det pedagogiske ansvaret var eit viktig element da sentralstyret i Utdanningsforbundet diskuterte regjeringa sitt framlegg til ny rammeplan for barnehagen tysdag.
På ulikt vis gav debattantane sterkt uttrykk for at det faglege ansvaret pedagogane har og plikta til å utvise pedagogisk skjønn måtte tydelegare fram i rammeplanen. Metodefridom for barnehagelærarane måtte inn.
Sentralstyret debatterte med bakgrunn i ei brei høyring i Utdanningsforbundet. Sentralstyremedlemmene var svært nøgde med det store tilfanget av høyringssvar.