- Sjokkert over kopling til kristen kultur

- Behring Breivik synest å vere driven av blant anna hat mot muslimar og islam og motstand mot eit fleirkulturelt samfunn. Samstundes hevdar han ville forsvare kristne verdiar. Korleis oppfattar du synspunkta hans?

- Eg kjenner ikkje synspunkta hans i detalj, men har fått med meg at han verkar gjennomtenkt og reflektert. Det gjer det endå meir sjokkerande at han knyter dette til kristen kultur. Min umiddelbare kommentar er: Det som skjedde på fredag står i den sterkaste kontrast til det vi trur på og det som vi vedkjenner som kristne, seier biskopen.

- Det å ta livet av éin person, er eit angrep på mennesket. No veit vi at mange ungdomar er blitt avretta i ein ufatteleg massakre. Det er eit attentat mot livet i dag og eit attentat mot framtida. I Bibelen står det at Gud seier: «Eg vil gje dykk framtid og von». Det er dette attentatmannen har gjort eit anslag mot, seier Kvarme.

Men midt i fortvilinga og sorga meiner biskopen at vi må halde fast på trua om framtid og von.

Fellesskap

- Korleis kan kyrkja og kristne medverke til å motarbeide framandfrykt og framandhat?

- Den kristne kyrkjelyd har frå starten av vore eit fellesskap på tvers av kulturar, folkeslag og språkgrupper. Noko av kjernen i evangeliet er det som Paulus seier: «For her er det ingen skilnad på jøde eller grekar. Alle har dei same Herren.

» Det er noko av det kristne fellesskapet sitt kjennemerke. Dette er noko som vi har forsøkt og stadig forsøkjer å formidle i kyrkja vår og i kyrkjelydane våre. No er det viktig å sette nytt søkjelys på dette. I dette engasjementet er det viktig å gå saman med alle som vil byggje samfunnet på eit slikt grunnlag, seier Kvarme.

Saman i sorg og protest

Oslo-biskopen var på ferie i Spania då terrorhandlingane fann stad. Han kom seg heim til Noreg laurdag kveld, slik at han rakk å delta i gudstenesta i Oslo domkyrkje søndag føremiddag, ei gudsteneste som stod både i sorga og vona sitt teikn.

Kvarme fortel at han har motteke mange helsingar frå muslimar, også frå utlandet, mellom anna i Midtausten. Han har og fått helsing frå sjefsrabbinaren i Jerusalem.

- Dei som har sendt helsingar seier at dei vil stå saman med oss i sorga og i protesten mot desse valdshandlingane, som er uttrykk for ein ekstrem nasjonalisme, seier Kvarme.

Han synest også det er verdt å nemne at fleire av moskeane i Oslo har hatt og skal ha markeringar på bakgrunn av tragediane som fann stad i Oslo og på Utøya sist fredag.