Illustrasjonsfoto: Ole Walter Jacobsen
Lærarane meiner læringsmiljøet er blitt dårlegare
I den siste Lærarundersøkinga frå Utdanningsdirektoratet er trenden klar: Kvaliteten på læringsmiljøet i skolen blir stadig dårlegare, ifølgje lærarane.
Sidan Lærarundersøkinga
i 2014 er vurderinga frå lærarane at læringsmiljøet i skolen er blitt stadig dårlegare. Den negative
utviklinga er ikkje særleg sterk, men likevel tydeleg, konstaterer
Utdanningsdirektoratet. Direktoratet
tolkar likevel svara slik at lærarane alt i alt vurderer læringsmiljøet i
skolen som godt.
I den nye Lærarundersøkinga, utført i 2022, er det spørsmålet om krenking i barne- og
ungdomsskolen som har den brattaste kurven i gal retning. Det er her dei
negative endringane har vore størst, ifølgje svara frå lærarane.
På ein skala
der 5 er best, altså minst krenking, og 1 er verst, har ungdomsskolen gått frå 4,2 til 3, 7 i lærarane si vurdering. I barneskolen har tala gått frå 4,1
til 3,8. I vidaregåande har måltalet ligge stabilt rundt 4,7.
Mobbing har og hatt ein relativt bratt negativ
kurve, men ikkje like bratt som for krenking.
Lite motivasjon
Motivasjonen
hos elevane får også relativ låg score av lærarane, det er berre det fysiske
arbeidsmiljøet som får lågare.
Skilnadane mellom kven som svarar kva på spørsmålet om motivasjon går mellom skoleslaga. Langt fleire lærarar i vidaregåande skole og
ungdomsskole enn i barneskole meiner manglande elevmotivasjon er eit
læringsmiljøproblem. Men trass i
at lærarane meiner at læringsmiljøet er blitt dårlegare, meiner dei at den
grunnleggjande meistinga til elevane ikkje har gått ned.
Ifølgje
Utdanningsdirektoratet viser ei samanlikning mellom Lærarundersøkinga og Elevundersøkinga dessutan at lærar og elevar er einige i utviklinga og stoda i skolen.
Rundt ti
prosent av skolane har gjennomført undersøkinga kvart år. Det er frivillig for
lærarane ved desse skolane å vere med. Utdanningsdirektoratet seier
undersøkinga gir eit bilete av kva lærarane i norsk skole meiner om
læringsmiljøet, men vil ikkje kalle undersøkinga representativ.
Heile undersøkinga les du her:
https://www.udir.no/contentassets/663a984b60ed452183e8fbaaf64c090f/larerundersokelsen-og-foreldreundersokelsen-2022.pdf
Læringsmiljøet er viktig for å unngå frafall