Arbeidarpartiet vil endre mobbeparagrafen i opplæringslova
Av omsyn til tryggleiken til lærarane vil Arbeidarpartiet endre kapittel 9 a i opplæringslova. Kjem dei i regjeringsposisjon, vil juristane i Kunnskapsdepartementet bli sette på saka.
Publisert
Sist oppdatert
– Møte med lærarar har vist meg at dei er sterkt opptatt av dette, svarar stortingsrepresentant Torstein Tvedt Solberg på spørsmål om kvifor Arbeidarpartiet, som einaste parti, lovar endring av den såkalla mobbeparagrafen om dei kjem i regjering.
Den lovteksten Arbeidarpartiet vil endre, er retta inn mot paragraf 9a-5, som omhandlar saker der lærarar krenker ei elev.
Slik lovteksten er utforma, blir lærarane ekstremt utsette, ifølgje Solberg. Paragrafen gir ikkje lærarane rett til å gi sin versjon av slike konfliktar før tiltak blir sette i verk. Men tiltaka kan få store konsekvensar for lærarane sin arbeidssituasjon, meiner Aps utdanningspolitiske talsperson.
– Mobbeparagrafen er svært viktig for å sikre elevane sin rett til å ha det trygt og godt på skolen. Og eg er overtydd om at konsekvensen den kan få for lærarane, er utilsikta, understrekar Solberg.
– Ingen har ønska at lærarar skal kome i slike vanskelege situasjonar. Likevel har ikkje regjeringa gjort noe for å endre dette, seier han.
Les også: Lærar Jens Vik fekk ikkje lese om skuldingar mot seg sjølv
Les også: – To ulike regelverk for arbeidsmiljøet for elevar og lærarar kan skape dilemma
Forskriftendring
– Korleis vil Arbeidarpartiet omformulere lova for å sikre lærarane betre?
– Det veit vi ikkje nå. Ei god formulering krev eit grundig arbeid, og det har vi ikkje ressursar til frå Stortinget. Difor vil vi kome i posisjon til å setje juristane i Kunnskapsdepartementet på saka.
Solberg meiner likevel at det i første omgang bør kome ei forskriftsendring for å betre situasjonen.
– Ei forskrift vil vi kunne få til ganske raskt. Men på lengre sikt må vi få ei skikkeleg lovendring. Da håpar og trur eg vi vil få ein god debatt som ikkje set elevar og lærarar opp mot kvarandre, understrekar Torstein Tvedt Solberg.
Ulike synspunkt
I arbeidet med ny opplæringslov har fleire instansar send inn sine høyringssvar. I svaret frå Barneombodet kjem det frem at dei ikkje vil endre mobbeparagrafen.
Dei skriv at dei er kjent med at det har vore situasjonar der tilhøvet mellom opplæringslov og arbeidsmiljølov har vore krevjande. Det er likevel fullt mogleg å balansere dei to regelverka, ifølgje Barneombodet.
Utdanningsforbundet på si side har tatt til orde for at paragraf 9a kan utfordre læraranes rettstryggleik. Leiar i forbundet, Steffen Handal, har etterlyst ei grenseoppgang mellom krenking, kritikk, usemje og grensesetting.
