"Gud hjelpe den som er gamal"
At Yngve Hågensen og Gerd-Liv Valla hadde gått med på skulepakke 2 eller noko liknande, er heller yttarst tvilsamt, meiner forfattaren av dette debattinnlegget.
Eg viser til innlegget av Olav A. Drevland 11.
mars i år (også i Utdanning nr. 7) under tittelen
«Takk for ingenting». Her takkar han Helga Hjetland for
at ho har teke frå han jobben. Men kvifor stoggar han berre
med dette? Her er meir å vera takksam for.
Lærarar over 58 år har fått ei
viss lette i leseplikta, så i grunnen skulle lærarane i
denne aldersgruppa, altså frå 58 år og oppetter, ha
all grunn til å takka. Eller har dei det? Eg er ikkje
overtydd. Eldre arbeidstakarar, og her er ikkje lærarane noko
undantak, har det vanskeleg nok på søkjarmarknaden
frå før av då ein ved den ovanfornemnde alderen
ikkje er så attraktiv på arbeidsmarknaden lenger jamvel
om fleire av desse kan vera ved god helse.
Men med litt velvilje kan eg skjønna at
ein arbeidsgjevar ikkje vil tilsetja slike arbeidstakarar som det
berre er utlegg med, det vere seg nedsett lesetid, ei veke ekstra
ferie for dei over 60 og meire til. Livsrøynsle samt lang
røynsle frå arbeidslivet (les skulen) er det ingen som
spør etter no for tida. Nei, det er ungdommen ein lyt satsa
på, serleg dei som er fullt på høgd med alt det nye
innan IKT.
Resultatet av skulepakke 2 vil verta at
lærarar i den ovanfornemnde kategorien vil ha null sjanse
på søkjarmarknaden. Kva har Helga Hjetland tenkt å
gjera med dette tru? Eg spør berre. For ifylgje Tabloid
på TV 2 av 22. oktober f.å. skulle ho hjelpa til med
å kaste ut alle dei lærarane som etter hennar meining
ikkje heldt mål i skulen lenger, men for å sukra den
beiske medisinen skulle me fyrst få prøva oss på
andre oppgåver. Likevel: Her er all grunn til tvil, som han sa
grisen då han såg at slaktaren var på garden.
I år skal ein høgtida at det er 200
år sidan presten, salmediktaren, salmebokutgjevaren og
folkevisesamlaren Magnus Bostrup Landstad vart født. Eg held
for tida på med å lesa meg opp på Landstad, og difor
vil eg ved dette høvet draga fram Kvenn-Karis vise av denne
forfattaren. I denne visa er omkvedet slik: «Gud hjelpe den
som er gamal.» Ein kunne få hug til å føya til:
Gud hjelpe den som er gamal med skulepakke 2 og som må ut
på søkjarmarknaden.
At Yngve Hågensen og Gerd-Liv Valla hadde
gått med på skulepakke 2 eller noko liknande, er heller
yttarst tvilsamt. Men Hjetland skal likevel ha takk for at ho
signaliserer at me kan spara oss kostnadene med kopiering av
vitnemål og attestar samt konvolutt og portoutgifter då
det ikkje vil føra til noko likevel. Me slepp såleis
å få tilbakemelding om at ein takkar for interessa med
å søkja, men tilsetjing har funne stad. Så aldri
så gale for at det ikkje er godt for noko.
Ved eitt tilfelle fekk ein lærar
fylgjande tilbakemelding: «Dessverre blei De ikkje
tilsett.» Punktum. Ein annan fekk attende meldinga at ved den
skulen som hadde lyst ut, var der eit så kalla ungt
miljø, og rektor meinte at han ikkje ville passa inn for skuld
at han var over den fyrste ungdommen sin. Det er som sagt ein
rektor sitt privilegium sjølv å velja kva slags
medarbeidarar han vil ha. Difor: Gud hjelpe den som er gamal.