Utdanningsforbundet legg heile skulda på
Israel
Ein lærarorganisasjon bør halda seg
unna vanskelege utanrikspolitiske spørsmål, meiner
innsendaren av dette debattinnlegget.
Eg vil med dette melda meg ut av
Utdanningsforbundet. Ein lærarorganisasjon der sentralstyret
uttaler seg heilt einsidig i eit vanskeleg utanrikspolitisk
spørsmål, tener ikkje interessene til medlemmane. I
konflikten i Midtausten legg Utdanningsforbundet heile skulda
på Israel. Ikkje med eit einaste ord krev dei at palestinarane
må stoppa sjølvmordsbombarane, ikkje med eit einaste ord
krev dei at all antisemittisme og antisionisme må fjernast
frå lærebøkene, ikkje eit einaste ord vert sagt om
ansvaret til skulen og lærarane når det gjeld bruk av
barn i krig.
Slik underteikna ser det, bør ein
lærarorganisasjon halda seg unna vanskelege utanrikspolitiske
spørsmål. Ein bør konsentrera seg om det
fagpolitiske og pedagogiske området som undervisningsmetodar,
løn, arbeidstid, o.l.